اضغط للتكبير
القيمة الغذائية للحصة
تشكن سوڤلاكي
وصفة متكاملة للتشكن سوفلاكي اليوناني بلمسة احترافية؛ دجاج متبل بعناية ومطبوخ بتكنيك يحافظ على طراوته، يُقدم في خبزة بيتا يدوية مع صوص تزاتزيكي كريمي وسلطة منعشة توازن النكهات.
المقادير
- دجاج: صدرين متوسطات + فخدتين منزوعين العظم (850 غرام)
- زيت زيتون: 80 مل (5.5 ملاعق كبيرة)
- خردل (مستردة): 15 غرام (1 ملعقة كبيرة)
- بشر ليمون: حبة كبيرة
- عصير ليمون: 30 مل (2 ملاعق كبيرة)
- ثوم مفروم: 12 غرام (4 فصوص)
- زعتر مجفف: 3 غرام (1 ملعقة كبيرة)
- ملح: 6 غرام (1 ملعقة صغيرة)
- فلفل أسود: 1 غرام (½ ملعقة صغيرة)
- --- سلاطة الخيار (التزاتزيكي) ---
- زبادي يوناني سادة: 200 غرام (¾ كوب)
- مايونيز: 75 غرام (⅓ كوب)
- خيار إنجليزي: 160 غرام (1 حبة كبيرة)
- عصير ليمون: 20 مل (1.5 ملعقة كبيرة)
- ثوم: 3 ضروس ثومة مبشورات
- شبت طازج مفروم: 5 غرام (2 ملاعق كبيرة)
- ملح: 5 غرام (1 ملعقة صغيرة)
- --- سلاطة الطماطم والبصل (Fresh Relish) ---
- طماطم (مفرومة): 120 غرام (2 حبة متوسطة)
- بصل أحمر (مفروم ناعم): 60 غرام (½ بصلة)
- معدنوس طازج (مفروم): 20 غرام (⅓ كوب)
- عصير ليمون: 5 مل (1 ملعقة صغيرة)
- سماق: 2 غرام (1 ملعقة صغيرة)
- --- خبزة البيتا ---
- دقيق (كابوتو): 320 غرام (2.5 أكواب)
- مياه دافئة: 200 مل (¾ كوب + 1 ملعقة كبيرة)
- خميرة فورية: 7 غرام (1 ملعقة كبيرة أو كيس)
- سكر: 5 غرام (1 ملعقة صغيرة)
- ملح: 6 غرام (1 ملعقة صغيرة)
- زيت زيتون: 30 مل (2 ملاعق كبيرة)
طريقة التحضير
تتبيل الدجاج
نجيبوا صحن نحطوا فيه الدجاج بتعنا؛ هنايا عندي صدرين متوسطات مقصوصات على تنين وعندي فخدتين دجاج منزوعين من العظم، كلهم نحيتهم من دجاجة كاملة. فوق الدجاج هذا نحط كمية كريمة من زيت الزيتون، خردل، بشر زوز ليمونات وعصير كامل من ليمونة وحدة ، ملح، فلفل أسود، زعتر. نخلطوا كويس ونغطوهم بالنايلو ونخلوهم في الثلاجة من ساعة، حتى ليوم كامل.
عجينة البيتا
نجيبوا العجانة بتعنا، ملحق العجن يكون راكب فيها. نحط دقيق، سكر، ملح، خميرة، ونخلطوا، مية دافية، زيت زيتون ونبدا نعجن على سرعة متوسطة. بعد حوالي تلاته الى اربعة دقايق حتشد روحها، بعد حوالي تلاته دقايق تانيات حتبدا معانا مطورة قلوتين كويس زي توا. الدقيق ل استخدمته دقيق كابوتو كل الاستخدمات. في سطح نظيف نحط شوية دقيق، نجيب عجينتي ونستخدم التكنيك بتع اللف والطي مش نساعد رابط القلوتين تشد روحها.
التقسيم والتخمير
بعدها ب ايديا من لوطا نحاول كيف ان نسكر عليها ونخليها كورة ناعمة زي توا. نوزنها والرقم ل يطلع معاي نقسمه على 6 (هنايا كل طرف عندي مفروض يطلع حوالي 90 قرام). نقسمهم ونحاول ان نلم كل الاطراف ف النص زي الصرة. نقلبها ونبدا ب ايدي نصنع ضغط من تحت العجينة بالتكنيك هذا، لين تطلع معاي كورة ناعمة. نجيب سفرة فيها ورقة زبدة، نرشها بشوية زيت، نغلفها بالنايلو ونخليها ترتاح (لمدة نص ساعة الى 45 دقيقة فمكان دافي).
سلاطة الخيار
نجيب خيارة متوسطة الحجم نبشرها ف المبشرة بالطريقة هادي. اول مانكمل نقيم الخيار ونحطه فوق كلينكس ونعصره كويس كويس لين ينزل كل اميته. نجيب صحن نحط فيه زبادي يوناني، مايونيز، تلاته ضروس ثومة مبشورات او فرمة ناعمة، الخيار بتعنا، ملح، عصير ليمون، ونجم السلطة الشبت. نخلطوها كويس لين تبدا معانا زي توا، نغلفوها بالنايلو ونحطوها ف الثلاجة لين يجي وقت الاستخدام.
سلاطة الطماطم والبصل
نجيب صحن نحط فيه طماطم مفروم فرمة متوسطة، بصل فرمة متوسطة، معدنوس فرمة متوسطة، سماق، عصير ليمون ونخلطوا. هنايا ماتبيش ادير ملح كنهادا هلبا بتبدا المية ل بتنزل من الخضرة. وهادي النتيجة النهائية، نغلفوها ونحطوها ف الثلاجة لين يجي وقت الاستخدام.
تطييب الخبزة
فسطح نظيف نحطوا شوية دقيق، نجيبوا كورة ونخلوها دائرية ب ايدينا، بعدين نفردها بالنشابة لين يبدا طولها حوالي 18 سنتيمتر. وبالطريقة هذه نخلي العجينة مرتاحة ومغطية فوقها بفوطة. بعدها في طاوة سخونة تكوي نحط العجينة بتاعي لمدة من 45 إلى 60 ثانية لكل وجه او بين نحصل تحميرات خفيفة. نحطهم فوق الفوطة مش ما يجفوش معنا ونستمر في تطييب باقي 5 قطع.
طهي الدجاج الاحترافي
الدجاج ليه حوالي 16 ساعة في الثلاجة وتغلف بالطعم صح. ركزوا معاي: التتبيلة فيها ثومة ومستردة، وهادم الزوز عدوهم النار القوية. نسخن المقلاة على نار متوسطة، ونصبوا شوية زيت نباتي كـ "تأمين" مش الدجاج ما يلصقش، ولأنه يتحمل الحرارة أكثر من زيت الزيتون. لازم بين كل قطعتين دجاج، نمسحوا المقلاة وننظفوها ونحطوا زيت جديد مش نضمن إن الدجاج يقعد لونه ذهبي وطعمه نظيف من غير حراق.
التغليف والتقديم
بعد ما كملنا طياب الدجاج وخليناه يرتاح، نجيبوا طرف الفخذ ونعطوه قصة في النص، بعدها نلفوه 90 درجة ونقصوا قصتين ثانيات.. هكي يطلعوا معانا 6 طروف حجمهم مثالي للسندوتش. نجيبوا ورقة زبدة، ونحطوا فوقها طرف خبزة البيتا الهشة، فوقها نحطوا زوز كواشيك كبار من سلاطة التزاتزيكي، بعدها ايد معبية من مكس الدجاج، واخيراً نزيدوا فوقهم زوز كواشيك كبار من السلاطة الفريش. نلفوا السندوتش بالسلفر كويس مش يشد روحه.
نصائح الشيف
الثومة والمستردة أعداء النار القوية، انتبه ينحرقوا بسرعة ويعطوا طعم مر. مسح المقلاة وتغيير الزيت بين كل طرحة هو سر اللون الذهبي .
